مبدأيا كدة انت في الأول هتواجه شوية صعوبات في المذاكرة انا شخصيا واجهتها وده الطبيعي طبعا عشان انت داخل على حاجة جديدة وطريقة مذاكرة جديدة ؟
أولا : انت هتاخد الترم الأول 7 مواد (التشريح - الهستولوجي - اليولوجي - الكيمياء العامة - الفيزياء الحيوية - المصطلحات الطبية - الإحصاء الحيوي)
أولا بالنسبة للتشريح هتاخد الترم ده العظام والعضلات الدكاترة عندنا في الكلية بيشرحوا كويس جدا وممكن تستعين بمصدر خارجي على اليوتيوب زي د.خالد شوغي طبعا لو عاوز تروح تشوف قناته على اليوتيوب اكيد طبعا هتعمل اي هتضغط هنا
ثانيا الهستولوجي يعتبر هي أصعب مادة عندك في الترم ده بس لو بتذاكر كل حاجة بأولها أوعدك هتجيب فيها تقدير كويس جدا هي مادة حفظ أكتر من فهم هتقابلك فيها كلمات كتيرة مش هتعرف معناها هنترجمها
عن طريق برنامج Google Translation أو ممكن تحمل أي medical dictionary من على جوجل بليه أو بقا الخيار الحلو والكويس جدا هتلاقي إن فيه مادة عندك اسمها مصطلحات طبية هي دي اللي هتعرف من خلالها معظم معاني الكلمات لو عاوز تشوف ملف المصطلحات
أيوة صح مادة المصطلحات الطبية مش بتضاف للمجموع هي ومادة الإحصاء بس بتفيدك في حاجات كتير على الأقل هتعرف تفهم معاني الكلمات.
ثالثا واخيرا ( البيولوجي - الكيمياء - الفيزياء ) دول مواد هتاخدوها من كلية علوم ودول بيبقوا أسهل حاجة عشان أغلب مواضيع المواد دي بيبقى واخدينها في الثانوية العامة أو الثانوية المعادلة العربية.
ايوة يعني انا هذاكر الحاجات دي ازاي برضو ؟
اسألك سؤال مهم هو انت على موقع اي ؟
#انا على موقع دكتور عبدالرحمن البحيري
طيب مفيش حد قالك بقا إن الموقع ده شامل على جميع الملفات والتبيضات لكل فرقة دراسية وكمان الخريجين يلا تقدر تشوف مواد فرقتك
كلمتين مهمين بقا من أخ أكبر منكم : الكلية مش للمذاكرة بس الكلية هي أفضل مرحلة هتعيشها اخرج واعمل اللي انت عاوزه او اللي انتي عايزاه ونظم وقتك هتلاقي الدنيا هتزبط معاك جدا!وصاحبوا ناس كويسين وحط تحت كلمة كويسين دي 1000 خط عشان الصحبة الصالحة هي اللي هتجرك لطريق الخير وماتستعجلش إنك تصاحب أي حد وخلاص.
صاحب الشخص اللي يقولك ده اذان الظهر أذن يلا نصلي , صاحب الشخص اللي يشجعك على المذاكرة .اختاروا صح .
وربنا يوفقكم كدة والأيام دي هتعدي وهتفتكروا كلامي ده كويس وهتقولوا ياااه الوقت عدى فعلا واحنا اللي كنا مستصعبين كل حاجة والدنيا طلعت سهلة.
بتمنى لكم التوفيق جميعا
زميلكم /د.عبدالرحمن علاء البحيري
خريج من كلية الطب البيطري - جامعة بني سويف دفعة 39 -2024
0 التعليقات:
إرسال تعليق