البوست التعريفي لكلية الطب البيطري

 

السلام عليكم ورحمة الله وبركاته

أهلا دفعة 2022-2023 في الجامعات وأهلا بكم في موقعي الذي يشمل جميع مواد وملفات كلية الطب البيطري - الف مبروووك للجميع سواء حققت ما تتمناه ودخلت الكلية اللي انت عاوزها أو مدخلتش الكلية اللي انت عاوزها

لكن أريد أن أذكركم بقول الله عز وجل ( وعسى أن تكرهوا شيئا وهو خير لكم )

مفيش حد عارف الخير فين إلا الله عز وجل لازم نرضي ب الأمر الواقع ونقول الحمدلله واحنا احسن من ناس كتير

نخش في الموضع هتكلم معاكم النهاردة عن طب بيطري

البوست ده هيفيد أي حد داخل بيطري وخاصة بيطري بني سويف

انا خريج دفعة ثانوي 2019

انا في كليه طب بيطري جامعه بني سويف

رايح كدا سنه رابعة عقبالكم

كلية طب بيطري عموماً من الكليات الجميلة جداً رغم الصعوبة الموجوده فيها الا انها ممتعة جداً في دراستها

انت كـ خريج ثانوية عامة بتدخل الكلية بتحس انك فى كوكب غير كوكبك ((انا فين ..انا ايه اللي جابني هنا))

بس عموما ده بيكون في البداية طبيعي جداً ..

انا اول ما دخلت انا قولت بس هحقق حلمى هنا

حضرت اول محاضره كانت محاضره تشريح

قولت مش مهم عادي يعني

خرجت من المحاضرة انا قولت لا انا مش هعرف اكمل

ف فكرت ان الثانوي عنق الزجاجة والكلام ده وان انتا هنرتاح ف الجامعه ده كلام بيصبرونا بيه مش اكتر والله..

الفكره ف ايه !؟ ان انت ادخل الكليه وانت عارف ان كل حاجه فيها الحلو والوحش عشان متتعبش

بالنسبة للانجليزي اللي معقدكم

براحه كدا والله هو اول ترم انت هتذاكر حرفياً والموبايل جنبك بترجم كل كلمة .وهعرفك في الآخر ازاي هتذاكر ماتقلقش انا معاك!

الفكرة ان انت بتدرس مصطلحات طبية كتير جدا ف مش بتكون عارفها مش اكتر ف هونها علي انفسكم ..

وصدقوني هيعدي اول ترم بصعوبة التاني اخف شوية سنه ثانية انت مش هتحتاج تترجم الا كل فين وفين يعني..

وعموما نصيحة لكم متتأثروش بالبدايات..بمعني

إن اول امتحان ف الكليه مهما كانت النتيجه سواء مرضيه لك او لا ..لان انت اذا كانت وحشة جداً بالنسبه لك هتحبط نفسك وتدي للماده اكبر من حجمها ..واذا كانت حلوة ده ممكن يخليك تتغر شوية بنفسك ف مش هتشتغل علي نفسك اووي ف تقع..

الكليه عموما سواء بيطري او اي كليه علمية

عايزه مذاكره اول ب اول لان الكم بيكون كبير علينا احنا مش متعودين عليه ف صدقوني المذاكره اول بـ اول هتخليك تحيب امتياز ..

نتكلم شويه بقى علي الكلية

=كليتى الجميله

طب ايه اللي يخليني احب او ادخل طب بيطري !؟

بص مش هقولك بقى احنا طب الانسانيه

ولا هقولك احنا المسؤلين ان الثروه الحيوانيه

ومش هقولك ان الوقايه خيرٌ من العلاج واحنا اساس الوقايه

بس هقولك ان الدكتور البيطري ده بيطلع عينه ف الكليه عشان يبقى دكتور فاهم عشان حياه الحيوانات والانسان بإيده ومسؤليته..

مبدأيا كدة الطب البيطري أتقدم في مصر الآونة الأخيرة وأصبحت مصر تهتم بالطب البيطري بشكل كويس عن السنين اللي فاتت

الكلية : أحد فروع كليات الطب لا شك طبعا

الدراسة : بتكون باللغة الانجليزية

عدد سنين الدراسة في الكلية: 5 سنين

طبعا الكلية مفيش فيها تخصصات يعني انت بتتخرج من الكلية بتشتغل في أي تخصص الكلية عندنا بتحتوي على 20 قسم اساسي تقريبا لو عاوز تعرف الأقسام 👈أضغط هنا

مجالات العمل :

البوست دا لكل طالب مش عارف هو دخل كليه الطب البيطري ليه.. لكل حد مش عارف يحدد هدفه ف الكليه.. ولكل حد مش عارف ميزة كليه الطب البيطري

كليه الطب البيطري هيه الكليه الوحيده اللي بتتخرج منها قادر تشتغل ف اكتر من 30 وظيفه ف 7 مجالات مختلفه

واحده واحده ومتتفاجئش وعد معايا

المجال الاول: رعايه الحيوان

_ممكن تفتح عياده بيطريه

_في حدائق الحيوان وفي محميات الحيوانات البرية

_ممكن تفتح صيدليه بيطريه

_تشتغل ف معامل التحاليل البيطريه وكمان معامل التحاليل البشريه

_ممكن تكون مندوب مبيعات ف شركات الادويه والاعلاف

_واخيرا ف مجال تربيه الخيول والفروسيه

المجال التاني : الانتاج

_مزارع تسمين الدواجن

_انتاج البيض

_مزارع تسمين الابقار والماشيه

_انتاج الالبان

_مزارع الاسماك

_مزارع تربية النعام

_الوراثه والرعايه التناسليه ونقل الاجنه

المجال التالت : الرقابه الصحيه علي الاغذيه

_الكشف ع اللحوم ف المجازر

_ف المستشفيات البشريه والفنادق للاشراف علي الاطعمه

_ف المصانع الخاصه بتصنيع الاغذيه المختلفه (quality control)

المجال الرابع : مكافحه الامراض والاوبئه

_ف الحجر البيطري ف المطارات والموانئ

_ف مكافحه وتقصي الاوبئه

_في مراكز فحص صحه الحيوانات والاسماك والدواجن المستورده الحيه والمذبوحه

المجال الخامس : مجال الصناعات الغذائيه

_دكتور مشرف في مصانع انتاج اللحوم ومنتجاتها

_دكتور مشرف في مصانع انتاج الالبان ومنتجاتها

المجال السادس : مجال صناعه الادويه والاعلاف

_في مصانع انتاج الادويه البشري والبيطري

_ف التسويق للادويه البشري والبيطري

_في مجال تصنيع الامصال والقاحات

_في تطوير ومراقبه الجوده في المصانع وشركات الادويه والامصال

_في مصانع تجهيز وانتاج الاعلاف

المجال السابع : الاحوال القضائيه والقوات المسلحه

_في الطب الشرعي والادله الجنائيه

_في مشاريع الاغذيه التابعه للقوات المسلحه

_ف الشرطه لرعايه الخيول وكلاب الامن والحراسه

ودا مش كل حاجه في مجالات تانيه وفرص تانيه ف ايدك تخلقها بس اهم حاجه تؤمن بقدراتك وترسم طريقك من البدايه

يلا بينا نعرف هنذاكر ازاي وأي الحاجات اللي هتساعدني في المذاكرة عشان ابدأ اتأقلم مع وضع الكلية 👈اضغط هنا

شاركه على جوجل بلس

عن دكتور عبدالرحمن علاء البحيري